Luk 17 | WSK | STEP | Se Jesus noko olekem nunga maonam, “Ikia memek duap duap kariimet nunga tagirok se te memek betemonko mu am taiwurukkowo. Bare kari awiriya nu kilek ikia memek mu saki alo nunga kasurso, mu kari umutang koma ikup biya nunguningkiri taukkowo!

Luke 17

Ikia memek kariimet nunga nongomang ningi nunguning maguwuso

(Mat 18:6-7; 21-22; Mark 9:42)

1 Se Jesus noko olekem nunga maonam, “Ikia memek duap duap kariimet nunga tagirok se te memek betemonko mu am taiwurukkowo. Bare kari awiriya nu kilek ikia memek mu saki alo nunga kasurso, mu kari umutang koma ikup biya nunguningkiri taukkowo! 2 Ikialko. Kari awiriya kuriang gotektek imi ^{▼▼Luke 17:2 Kariimet saki ikisan Jesus kuriang gotektek maso mu olekem sang nongomang ningi nunguning sokel mena wore nunga balso.} nunga ningi bo ikia memek kausok se kilek memek te dagulokko negeruk, mu kari sang kari mu ilumon manga biya mu dogotak ago kalomon, ale gagi ningi sapomon se sarenga namurukko mu asele terong. Uwuta mu ikup biya mena. Bare nu ikia memek uwutata bitiruk, mu nu koma memek nunguningkiri taukkowo! 3 Buta se nina ninga bagara aolak ko ninguru sinar talko!

“Nika launuria bo kilek memek bitiruk, mu ni nu ekes te manaruko. Se nu giris palaguk, mu ni noko ikup mu siwu waruko. 4 Agi nu worem suwanta te betela bitiruk, nama 5, se 6-7 iwita, se akingtala peleruk kete tairuk ale akingtala baluk, ‘Ani giris palagem,’ mauk, mu ni me ko gemang magurukko, ni am akingtala ko ikup siwu saparko.”

5 Se apostle alo Kari Biya manorman, “Ni anananga nangamang ningi nunguning sangaruko!” ma balman.

6 Se Kari Biya nunga maonam, “Nenenga nengemang ningi nunguning mu tam mustard ko muguri iwita gotektir nunguningkiri agi bare, mu nina tam sumu maonal, ‘Tam, ni nimi bila ale nama gagi ningi nimi agupko,’ ma balal, mu tam mu nigiring karukko.

Ura kari am ura ilumonko ko den

7 “Nenenga ningi kari bo ko ura dungan ago, se ali pagaruwa agi, sipsip bitaruwa agi, peleruk kawam te tairuk, mu ko kari biya iwita manuk i? ‘Ni tai dagi ale na noko,’ ma baluk i? 8 Mu mena. Mu nu iwita manukko, ‘Ni aninga na nunguru, ale guang ani te na aisuko wore to nagur, ale aga bitaru sager, se ani na yu naik, asele ni udagi te na noko,’ ma balukko. 9 Se ura dungan mu uwutata bitiruk mu ko kari biya mu nu amilmil tuok i? Mena. 10 Se nina betela, tom nina mel suen biya Kaem ninga maonam mu bita kutuwural, mu nina iwita balalko, ‘Mu ana yam ura kari la pa! Mu anananga ura borta betenakko se beteman,’ ma balalko.”

Jesus kari nungumik laera posara 10 mu nunga nungam

11 Jesus Jerusalem aolak iluwam namakaso, nama Samaria Galilee ko kusumuri aolak iluwakaso. 12 Nu wonong bo te aratuwaram se kari lepra ago 10 nama ari gilingiman. Nuna nama awar biya sanamaman, ale aiman balukasan, 13 “Jesus! Kari Biya! Ni gemang nangaruko!” makasan. ^{▼▼Luke 17:12-13 Kariimet nungumik laera posara ago: Lev 13:45-46; 14:1-4. Munan balam nuna kariimet nunga ningi me bagomonko.}

14 “Se nu nungarkam ale nunga maonam, “Nina namaral ale ninga ningimik guang priest alo nunga kausal se aringimonko,” mam. Se nuna aolak iluman nama se lage te nungumik nungeram se aringiman.

15 “Se nunga ningi kari bo kumik nungeram wore numi iki bita ko peleram, ale biyala aikaso Kaem nup patawukaso. 16 Ale nama Jesus suwik duap ningi bugura kulukuam ale amilmil tuam. Kari mu Samaria kari.

17 “Se Jesus nu isuam, “Ani nina kari 10 ninga nungem. Se kari 9 tala mu apalak anisan se ni keta tairem? 18 Bo ta me peleram tairam Kaem nup patowaram e? Ni sor bo ko kari keta suwanta e?” 19 Asele nu Samaria kari mu maonam, “Bares namarko!” mam. “Ni aninga den ko gemang ningi nunguning se kimik nungeram.”

Kaem ko kingdom tairukkowo

(Mat 24:23-28)

20 Pharisee kari sang Jesus isarman, “Kaem ko kingdom amaru te tairukko ya?” maman. Se nu nunga maonam, “Kaem ko kingdom am tetela la taiso, kariimet nomotam te me arigisan. 21 Bo baluk ‘Iweya’ mauk, bo baluk ‘Uwoya’ ma me balukko. Mu awuk, Kaem ko kingdom maingkala tairam nina ningi aniso.

Kari ko Kuriang ko taira tom

(Mat 24:23-28, 37-41)

22 “Tom tai aratuk se nina Kari ko Kuriang arigalko ninguru ko kaeralko, bare diram tom mu te me arigalko. 23 Saki ninga manarmon, ‘Tairam iweya!’ mamon, se saki ‘Taiwoso uwoya!’ ma balmonko. Bare nina den mu ko me nengemang ningi nunguning aruk, se arigalko me loagaralko. 24 Mu awuk, tom Kari ko Kuriang peleruk tairukko, mu pure biliwilik maso se sor likilim nikim pagoso se kariimet arigisan iwitata, nu wetang te peleruk tairuk se arigalko. 25 Bare nu kariimet tom imi ko mu nubiring tumon se ikup biyala giok asele ko.

26 “Munan girakala nuna Noah ko tom te bitakasan umutang turantala bitawomon se Kari ko Kuriang peleruk tairukko. 27 Noah ko tom te mu nuna na yu no gi se, kari imet gi se, imet kari gi se, munan umutang bitawaman la, nama Noah ko nuwus, ko gotek noton ago nunga giam arungu dal biya te aragam. Se yu lom biya kaparam ale kariimet Noah ko den nubiring tui lagaman mu suen la nunga mituwuram se menaman.

28 “Se munan koma suwanta tala Lot ko tom te kariimet beteman. Nuna am na yu la no gi se, dia gurugu se, ningam ura ilu se, kawam kalo se bita karogo ago nama lagaman, 29 se Lot Sodom wonong beteram namawaram se tom suwanta nukung te la tama pagam ale tuwik iwita kani kani kaparam se kariimet suen la kani namaman.

30 “Se munan koma suwanta tala kariimet bitawomon se Kari ko Kuriang peleruk tairuk numi wetang te bitirukko. 31 Tom mu te kari bo ko kawam ko gul te baguruk agi mu, nu kapuruk ko melmasak kawam ningi aniso mu me ta giokko, nu am diram nagurok namurukko. Butatala, kari bo ko ningam te baguruk agi mu, nu peleruk ko mel bo me ta taukko. 32 Lot ko nuwus te ko ikialko! ^{▼▼Luke 17:32 Lot ko nuwus: Genesis 19:15-17, 26.} 33 Kari awiriya kota ko ikia, ko gomang karo tuokko kaeruk, mu nu Kaem ko marak yawara me taukko. Bare kari awiriya kota ko ikia, ko gomang buring tuok, mu nu Kaem ko marak yawara taukko.

34 “Ani ninga manorsam, tom mu te turom kari ilagala kawam ningi aniwomon se bo tamon ale bo betemon se am bagurukko. 35 Aking imet ilagala wete na nunguruwomon se bo tamon ale bo betemon se am bagurukko.” 36 ^{▼▼Luke 17:36 Batoga sang girakala batagorman mu te den imi ago aniso: “Aking kari ilagala ningam ningi bagomon se bo mu tamon ale bo betemon se am bagurukko.”}

Se nuna den mu ikiman ale Jesus isarman, “Kari Biya,” maman, “Mel ni balsam mu aparete aratukko ya?”

Se Jesus den ira bo nunga maonam, “Kuwim mel te kuera ale iwiwara umutang te la inanganang gaogao tai tai kapasan.”

37